Monday, December 29, 2008

ആത്യന്തിക സ്നേഹം !(The ultimate love…...!)

ആത്യന്തിക സ്നേഹം
*****************
വ്യഥയെനിക്കില്ലയീ മര്‍ത്യര്‍ മറന്നാലും
പരിഭവം പറയില്ല പകരമില്ലെങ്കിലും
പതറില്ല ഞാന്‍ അവര്‍ കണ്ണടച്ചീടിലും
കരുതുവാന്‍ നീ കൂടെയില്ലേ -ഈ 
പൊഴിയുന്ന കണ്ണുനീരൊപ്പാന്‍

പറയാതെയൊപ്പം കൂടെക്കരഞ്ഞവര്‍
നിർബന്ധമായിയെൻ പ്രാണന്‍ പകുത്തവര്‍
പറയാതെ വഴിമാറിടുമ്പോള്‍, കണ്ടകലെ ...
അതിമോഹനം നിന്‍റെ രൂപം 
കുരിശിലെ ദിവ്യമാം സ്നേഹം .

പകരമാശിക്കാതെ സ്നേഹം പകരുവാന്‍
സ്നേഹിതനായി സ്വജീവന്‍ ത്യജിക്കുവാന്‍
ദേവാ പഠിപ്പിച്ച നിന്‍ ജീവിതപാഠമോ ,
പകരുവാന്‍ കഴിവെനിക്കില്ല - ന
ഗുരുവായി നീയണയുകില്ലേ...

Thursday, December 25, 2008

പിരിയാത്ത സ്നേഹം !(The inseparable love..…!)

പിരിയാത്ത സ്നേഹം
*****************
ഇനിയെന്‍റെ കണ്ണീരു മാറും- നാഥന്‍
ഇനിയെന്നില്‍ മോദം നിറയ്ക്കും
വ്യഥകളും ‌വേദനയുമൊക്കെയും പഴയതാം
കഥകളായി ഓർമ്മയിൽ മായും -നാഥന്‍
ഇനിയെന്നില്‍ മോദം നിറയ്ക്കും

ശാന്തിതന്‍ നാളം തെളിക്കും- നാഥന്‍
ഖേദങ്ങളെല്ലാം അകറ്റും
നഷ്ടസൌഭാഗ്യങ്ങളെല്ലാം
മേല്‍ക്കുമേലെന്നില്‍ നിറയ്ക്കും -നാഥന്‍
ഇനിയെന്നില്‍ മോദം നിറയ്ക്കും

ഒരു നാളും പിരിയാതെ ഇനിമേൽ- ഞാനെൻ
നാഥന്‍റെ ചാരത്തു നില്‍ക്കും
പ്രതികൂലമേറുന്ന നേരം
പൈതലായ് ചേര്‍ന്നു ഞാൻ നില്‍ക്കും-നാഥന്‍
ഇനിയെന്നില്‍ മോദം നിറയ്ക്കും

((ശ്രീ പണിക്കര്‍ സാര്‍ ഇതിന് സംഗീതം നല്കിയിട്ടുണ്ട്.. കേള്‍ക്കുക..))

ഉണ്ണിയായ സ്നേഹം !( The love born…..!)

ഉണ്ണിയായ സ്നേഹം
***************

നൃത്തം ചവുട്ടിക്കൊണ്ടുച്ചത്തില്‍് പാടിടാം
ചിത്തമുണര്‍ത്തുന്നൊരാനന്ദ ഗീതം-
ഹൃത്തടം തന്നിലുയരുന്ന ഗീതം

നരകുലരക്ഷകനീധര തന്നിലായ്
മേരി തന്‍ സൂനുവായ് ജാതനായ്-
മാനവരാശി തന്നാശ്വാസമായ്

ദൂതന്മാരേകിയാ സദ്വാര്‍ത്ഥ മര്‍ത്യന്
വിദ്വാന്മാരെത്തിയാത്താരത്തിന്‍ പാതേ-
പൈതലാമീശന്‍റെ ദര്‍ശനം തേടി

ആ മഹാസ്നേഹമിന്നോര്‍ത്താര്‍ത്ത് പാടാം
ഈ മഹിനാഥന് സ്തോത്രം കരേറ്റാം-
സ്നേഹമാകും തിരി നിത്യം തെളിക്കാം

Thursday, November 27, 2008

അനുപമസ്നേഹം ! ( The incomparable love…!)

അനുപമസ്നേഹം
*****************
ആരിലുമുപരിയായ് എന്നെ സ്നേഹിക്കുവാന്‍
നാഥാ നീയെനിക്കില്ലേ നാഥാ നീയെനിക്കില്ലേ
നിന് തിരുമുൻപിലെൻ ഹൃദയം പകരുമ്പോൾ
ആശ്വാസം ഏകുകില്ലേ നാഥാ നീയെനിക്കില്ലേ

ആരുമില്ലാതെ ഞാനേകനായി കേഴുമ്പോള്‍
ചാരെ നീ തോഴനാവില്ലേ!
ഇരുളില്‍ വഴി തപ്പിത്തടയുമ്പോഴൊക്കെയും 
വഴിവിളക്കായ്‌ നീ വരില്ലേ!
എന്റെ കൂട്ടിനായി കൂടെ വരില്ലേ 

ലോകര്‍ വെറുത്തെന്നെ വേര്‍പെടുത്തുമ്പോഴും
നിന് മാർവ്വിൽ നീ ചേർക്കുകില്ലേ 
സങ്കടം താങ്ങാനാവെതെ കരയുമ്പോൾ 
നിറകണ്ണ് നീയൊപ്പുകില്ലേ!
എന്നെ മാറോടു നീ ചേർക്കയില്ലേ

അറിയുന്ന സ്നേഹം ! (The knowing love.....!)

അറിയുന്ന സ്നേഹം !
*****************
അറിയുന്ന കാലം മുതല്‍ക്കേ
അനന്തമായ് സ്നേഹിപ്പവന്‍ നീ
നിറയുന്ന വാല്സല്യമോടെ
അനുദിനം പാലിപ്പവന്‍ നീ

പിരിയാതെ നിഴല്പോലെയെന്നും
എന്നെ തോഴനായി കരുതുന്നവൻ നീ
പതറുന്ന വേളയിലൊക്കെ
എന്നെ തകരാതെ താങ്ങുന്നവന്‍ നീ

പറയാതെ ഞാനകന്നിട്ടും
എന്നെ അലിവോടെ കാതോര്‍ത്തവന്‍ നീ
കുറ്റങ്ങൾ  കണക്കു വെക്കാതെ
എന്നെ പുത്രനായി മാറോടു ചേര്ത്തു 

--------------------------------------------------------
ഇത്രമേൽ സ്നേഹിക്കുവാനായി
എന്നിൽ യോഗ്യത എന്തുള്ളു നാഥാ
പകരമായിഇനിയൊന്നു മാത്രം
എന്റെ ജീവിതം അങ്ങേയ്ക്ക് മാത്രം